ON MY WAY

USB (Connect two computers for files and internet sharing)

WILLIAM — Mon, 26 Dec 2011 05:24:10 +0000

ភ្ជាប់កុំព្យូទ័រពីរគ្រឿង តាមរយៈ USB (Connect two computers for files and internet sharing)

វិធីដែលងាយស្រួលបំផុតសម្រាប់តភ្ជាប់កុំព្យូទ័រពីរគ្រឿង ឱ្យអាចផ្លាស់ប្ដូរហ្វៃល៍គ្នាបាន នោះ គឺតាមការប្រើខ្សែ USB-USB Cable ។ បើយើងតភ្ជាប់កុំព្យូទ័ររបស់យើងតាមវិធីនេះ យើងអាច Transfer ហ្វៃល៍ រវាងម៉ាស៊ីនកុំព្យូទ័រទាំងពីរទៅវិញទៅមកបានងាយ ក្រៅពីនេះយើងនៅអាច Share internet connection បានផងដែរ ។ តែសូមប្រយ័ត្នចំពោះអ្វីដែលយើងទិញយកមកប្រើនោះផង ព្រោះខ្សែកាបយូអេសប៊ីប្រភេទនេះ វាមានច្រើនបែប ដោយរួមទាំងខ្សែយូអេសប៊ីប្រភេទធម្មតាផងដែរ ។ សូមមើលរូបខាងក្រោមនេះ ខ្សែយូអេសប៊ីទាំងពីរខាងលើនេះ មានរូបរាងដូចគ្នា តែអ្វីដែលវាអាចធ្វើបាន គឺមិនដូចគ្នាទេ ។ ឯខ្សែយូអេសប៊ីមួយបែបទៀត គឺជាខ្សែយូអេសប៊ីសម្រាប់តភ្ជាប់ទៅកាន់គ្រឿងផ្សេងៗ ដូចជា ព្រីនថឺរ ស្កេនណឺរ ហាដឌីសក្រៅជាដើម មិនអាចយកមកតភ្ជាប់ពីកុំព្យូទ័រទៅកុំព្យូទ័រមួយទៀតបានឡើយ បើពុំនោះទេ វានឹងបណ្ដាលឱ្យខូចកុំព្យូទ័រទាំងពីរជាមិនខាន ។

ដើម្បីឱ្យការបញ្ជូនហ្វៃល៍បានលឿន សូមជ្រើសរើសយកយូអេសប៊ីប្រភេទ Version 2.0-3.0 ព្រោះវាមានល្បឿនលឿនជាង Version 1.1 ដែលមានចំណាស់ចាស់ហួសទៅហើយ ។

USB Cable ទាំងពីរបែបខាងលើនេះ មានប្រូក្រាមរបស់វាមកជាមួយ ដើម្បីឱ្យវាអាចប្រើការបាន បើពុំនោះទេ យើងមិនអាចប្រើការវាបានឡើយ បើគ្មានប្រូក្រាម Driver របស់វា ។

វិធីប្រើ និង Install វាមានភ្ជាប់មកជាមួយស្រាប់ វាជាភាសាអង់គ្លេស និងជា PDF File អាចបើកមើលដោយប្រើ Adobe Acrobat ។ តែយើងក៏អាចមើលតាមវិធីតម្លើង តាមរយៈការណែនាំដែលមានមកជាមួយខ្សែកាបនោះបានដែរ ។ វិធីធ្វើ និងវិធីតម្លើងឱ្យអាចប្រើការបាន គឺសឹងស្រដៀងគ្នា មិនមានអ្វីខុសគ្នាច្រើនឡើយ ។ ហ្វៃល៍នេះ មានដាក់ភ្ជាប់ក្នុងកញ្ចប់ Folder របស់ព្រឹត្ដិប័ត្រនេះ ។

ក្រៅពីប្រូក្រាម ដែលមកជាមួយខ្សែកាបយូអេសប៊ីនោះ យើងក៏អាចប្រើប្រូក្រាមក្រៅជាមួយខ្សែកាបយូអេសប៊ីនេះបានដែរ តែត្រូវឱ្យប្រាកដថា ខ្សែដែលយើងមាននោះ វាអាចឱ្យប្ដូរពី Data Bridge Mode and network Mode បាន ។ ប្រូក្រាមនោះ មានឈ្មោះថា PClinq2.exeវាជាប្រូក្រាមមួយដែលបង្កើតឡើងដោយជនអនាមិក គ្មានឈ្មោះជាម្ចាស់ និងត្រូវបានគេចម្លងចែកគ្នាប្រើយូរមកហើយ (មិនបាច់ទិញទេ) ក្នុងករណីដែលយើងគ្មានសូហ្វវែរ យើងអាចប្រើវាជាជំនួសបាន ។ វិធីប្រើ ៖

សូមកំទាន់ដោតខ្សែយូអេសប៊ីនេះ, ត្រូវ Install Software ជាមុនសិន ( Software come with USB Cable) ត្រូវរង់ចាំរហូតយើង Install វារួចរាល់ហើយទើបភ្ជាប់ខ្សែ USB Cable

រូបភាពខាងលើនេះ បង្ហាញពីការភ្ជាប់សម្រាប់ File Transfer រូបភាពខាងក្រោមនេះ បង្ហាញពីការភ្ជាប់សម្រាប់ Network and Internet Sharingរូបភាពខាងលើនេះបង្ហាញពីការភ្ជាប់សម្រាប់សម្រាប់ USB – USB Network បញ្ជូនហ្វៃល៍និង Share Internet ទៅឱ្យម៉ាស៊ីនមួយផ្សេងទៀត ។ វាគឺជាវិធីមួយដែល បើយើងមិនមានជម្រើសណាផ្សេង ឬជម្រើសផ្សេងទៀត មិនអាចប្រើការបានក្នុងខណៈដែលយើងត្រូវការ ។

Filed under: Business & Investment

MAINTAIN LAND QUALITY

WILLIAM — Mon, 26 Dec 2011 05:16:57 +0000

ធ្យូងគឺជាថ្នាំព្យាបាលដីដែលគ្មានគុណភាព

នៅព្រៃអាម៉ាហ្សុន គេបានរកទីតាំងមួយចម្លែកប្លែកពីទីដទៃគឺ ដីខ្មៅដូចធ្យូងមានគុណភាពល្អសម្បូរណ៍ដោយជីវជាតិ និងប្រសើរជាងដីល្បាយ ដីឥដ្ឋដែលនៅក្បែរខាងទីនោះ។ ពួកក្រុមអ្នកស្រាវជ្រាវបានរកឃើញថា ដីនៅត្រង់ទីនោះត្រូវបានប្រែប្រួលទៅជាខ្មៅដូច្នេះកាលពីជាងមួយពាន់ឆ្នាំមុន ហើយវាបានប្រែប្រួលមកជាខ្មៅដូច្នេះឯកឯង តែគេដឹងថាហេតុអ្វីបានជាវាក្លាយទៅខ្មៅដូចច្នេះ នោះគឺមកពីផេះ និងធ្យូងព្រោះមានស្លាកស្នាមខ្លះបន្សល់នៅទីនោះ ។

ក្រុមពួកអឺរ៉ុបបានធ្វើដំណើរទៅអែលដឺរ៉ាដូ (Eldenado) ដើម្បីស្វែងរកមាសនៅក្នុងទឹកដីអាម៉ាហ្សុន តែពួកគេមិនបានរកឃើញមាសតាមបំណងរបស់ពួកគេឡើយ ផ្ទុយទៅវិញដីនៅខាងក្រោមជើងដែលពួកគេបោះទីតាំងនោះគឺជា ដីខ្មៅម្យ៉ាងយ៉ាងចម្លែក វាសម្បូរណ៍ជីជាតិខុសប្លែកឆ្ងាយពីដីដទៃឯទៀតរហូតមិនអាចប្រៀបបានឡើយ ។

ជាធម្មតាផ្ទៃខាងលើរបស់ដីត្រូវសឹករិចរិលម្តងបន្តិចៗដោយសារទឹកភ្លៀងហូរកាត់មានតែជីជាតិតិចតួចប៉ុណ្ណោះត្រូវបានបឺតស្រូប យកដោយដំណាំឈើ ក្រៅពីនោះវារសាត់អណ្តែតទៅតាមទឹកអស់ព្រមទាំងហូរច្រោះយកជីជាតិពីផ្ទៃខាងលើទៅជាមួយផងដែរ នេះគឺជាសឹករិចរិលរបស់គុណភាពដី ។

ត្រង់ទីកន្លែងដែលគេបានរកឃើញដីខ្មៅនោះគេបានរៀបចំវាឲ្យក្លាយទៅជាចំការដំណាំធំៗ មានទាំងបន្លែ មានទាំងដំណាំឈើយកផ្លែ និងត្រូវបានគេដាំសាកនៅទីនោះច្រើនឆ្នាំមកហើយ ។ អ្វីដែលគួរឲ្យងឿងឆ្ងល់ជាងគេនោះ គឺនៅត្រង់ថាអ្នកដាំដំណាំ មិនបានប្រើជី សូម្បីបន្តិចណាឡើយ ប៉ុន្តែដំណាំនៅតែល្អ ទោះបីជាបានដាំច្រើនឆ្នាំមកហើយក៏ដោយ ហេតុផលដែលដីនៅទីនោះអាចរក្សាគុណភាពរបស់វាបាន គឺជារឿងមួយដែលគេរកស្មាន មិនត្រូវព្រោះដីកាលបើបានដាំដំណាំវា និងបឺតស្រូបយកជីជាតិពីក្នុងដីជារៀងរាល់ថ្ងៃ ធ្វើឲ្យដីនោះខ្សត់ជីជាតិម្តងបន្តិចៗ។ តែដីនៅទីនោះមិនបានបង្ហាញសញ្ញាថាវាខូចគុណភាពសោះ សូម្បីតែបន្តិចក៏គ្មានដែរ វាជារឿងមួយដែលគេបានចាត់ទុកថាជាការចម្លែកបំផុត ។

កាលពីប៉ុន្មានឆ្នាំមុននេះក្រុមអ្នកស្រាវជ្រាវមួយក្រុមផ្សេងទៀតបានរកឃើញថាដីនៅទីនោះ ប្រែទៅជាមានពណ៌ខ្មៅ និងសម្បូរណ៍ដោយជីជាតិបែបនេះ គឺមិនមែនវាកើតឡើងដោយធម្មជាតិនោះទេ តែផ្ទុយទៅវិញវាកើតឡើងដោយសារស្នាដៃរបស់មនុស្សទៅវិញ ការរកឃើញថ្មីនេះ បានលុបចោលការស្រាវជ្រាវកាលពីលើកមុនដែលបានបញ្ជាក់ថាវាកើតឡើងដោយធម្មជាតិនោះ ។

កាលពីច្រើនរយឆ្នាំមុននោះអ្នករស់នៅទីនោះបានប្រើប្រាស់ធ្យូងសម្រាប់កប់ទៅក្នុងដីត្រង់ទីដែលពួកគេដាំដំណាំ ហើយពួកគេបន្តធ្វើបែបនោះតរៀងមកជាច្រើនឆ្នាំ នោះគឺជាមូលហេតុដែលដីនៅត្រង់ទីនោះប្រែក្លាយពីដីធម្មតាទៅជាដីដែលមានពណ៌ខ្មៅបែបនេះ ។

រហូតមកទល់ពេលឥឡូវនេះទើបបានគេដឹងថាធ្យូងអាចស្ថិតនៅក្នុងដីរហូតរាប់រយឆ្នាំ និងប្រែក្លាយដីនៅត្រង់ទីដែលមានវាឲ្យទៅជាដីដែលមានពណ៌ខ្មៅ និងសម្បូរណ៍ដោយជីជាតិ ។

ធ្យូង គឺជាវត្ថុម្យ៉ាងដែលឆេះ មិនអស់ព្រោះពេលវាត្រូវបានគេដុតក្នុងឡ វាមិនមានអុកស៊ីសែនគ្រប់គ្រាន់សម្រាប់បញ្ឆេះឈើដែលដុតនោះឲ្យសុះទៅជាផេះឡើង គឺបានត្រឹមតែសម្ងួតវា និងក្រោយមកក្លាយទៅជាធ្យូង ដូច្នេះធ្យូងកើតឡើងដោយសារជាតិទឹកដែលមាន និងហ្គាស ដែលវាមានត្រូវបានរំហួតចេញ ហេតុនេះធ្យូង គឺជាកាបោនសុទ្ធសាធ ។ ធ្យូងមិនមែនត្រូវបានផលិតសម្រាប់តែយកដុតចំណីអាហារតែប៉ុណ្ណោះទេ ប៉ុន្តែវាត្រូវបានគេយកទៅប្រើការច្រើនយ៉ាងផ្សេងទៀតរាប់មិនអស់ ។

ដូច្នេះការប្រើប្រាស់ផេះពីចង្ក្រានបាយសំណល់ធ្យូងពីចង្ក្រានបាយ យកទៅដាក់ក្បែរខាងគល់ដំណាំ គឺជាវិធីមួយយ៉ាងល្អបំផុត ដើម្បីបង្កើនគុណភាពដី ផេះ អង្គាមយកទៅចាក់រាយលើដីមុនពេលភ្លៀង ឬក្នុងរដូវវស្សា អាចជួយបង្កើនគុណភាពដីបានដូចគ្នា ប៉ុន្តែការដាក់កំទេចធ្យូងក្នុងរណ្តៅដាំដំណាំអាចនិយាយបានថាមានប្រសិទ្ធភាពច្រើនជាងគេ ពីព្រោះវាអាចនៅទីនោះបានយូរអង្វែង និងបន្តជួយប្រែក្លាយដីឲ្យមានជីវជាតិល្អឡើងវិញបានទោះបីជាដីស្រែក្តី ដីដាំដំណាំក្តី សឹងអាចទទួលបានផលល្អដូចគ្នាដែរ ។

សម្រាប់អ្នកមានដីដែលខូចគុណភាព សូមព្យាយាមប្រើប្រាស់ធ្យូងកំទេចធ្យូង ដោយការជីកជាចង្អូរវែងៗ រួចប្រមូលកំទេចឈើមកដាក់រាយវាហើយដុតកុំឲ្យវាឆេះគឺគ្រាន់ត្រឹមតែឲ្យវាហុយៗ រហូតវាឆេះអស់មែកឈើទាំងនោះបន្ទាប់មកកាយដីលុបវាភ្លាមៗ ។ យើងអាចធ្វើបែបនោះឲ្យបានច្រើនកន្លែងនៅលើទីតាំងដីរបស់យើងយូរៗទៅគ្រប់កន្លែងនៃដីរបស់យើង និងលែងសូវមានជម្ងឺបែរទៅជាសម្បូរណ៍ជីជាតិ គុណភាពដី និងប្រែក្លាយទៅជាល្អឡើងជាលំដាប់ ក្រៅពីនេះវានឹងជួយកាត់បន្ថយការចំនាយទៅលើការប្រើប្រាស់ជីបានមួយចំណែកយ៉ាងធំដែរ។

ខ្ញុំនៅចាំបានថាកាលនៅក្នុងរបបប៉ុលពត ប្រធានសហករណ៍មួយរូបបានយកអ្នក ១៧ មេសាម្នាក់ឲ្យដាំដំណាំឲ្យខ្លួនទីតាំងរបស់ផ្ទះប្រធានសហករណ៍នោះ គឺនៅពីក្រោយរោងម៉ាស៊ីនកិនស្រូវមួយក្នុងភូមិអណ្តូងចេញ ហួស ប៉ុស្តិ៍វិទ្យុចំការចេក តែមួយឬពីរគីឡូម៉ែត្រតែប៉ុណ្ណោះ ។ នៅពីក្រោយរោងម៉ាស៊ីនកិនស្រូវនោះមានពំនូកអង្កាមមួយយ៉ាងធំ ដែលបន្សល់ទុកមកបងប្រុសដែលត្រូវប្រធានសហករណ៍ (មកពីខេត្តតាកែវ ហៅថាពួកនិរតី) បានបង្គាប់ឲ្យអ្នកដាំដំណាំនោះកាយយកអង្គាមនោះមកគជាពំនូតជួរៗ រួចដុតវា បន្ទាប់មកយូរក្រែលដែរខ្ញុំឃើញត្រង់ទីដែលបានដុតអង្កាមនោះត្រូវគេដាំត្រាវ និងពោត មើលទៅឃើញថាដំណាំនោះល្អណាស់ ឯចំណែកដីនៅត្រង់ទីនោះ ក៏មានពណ៌ខ្មៅដែរមិនដូចពីពេលមុនខ្ញុំធ្លាប់ស្គាល់ និងឃ្វាលគោត្រង់នោះ ដីនោះគ្មានជីជាតិទេមានពណ៌សដូចខ្សាច់ ព្រោះជាដីទួល មិនលិចទឹក តែមិនយូរប៉ុន្មានប្រធានសហករណ៍នោះក៏ត្រូវបានគេដកចេញពីទីនោះទៀតតែដីត្រង់ទីនោះទោះបីមិនមានអ្នកណាដាំអ្វីទៀតក៏ដោយ ក៏វានៅតែមានពណ៌ខ្មៅដដែល សូម្បីស្មៅ និងផ្ទីថ្ម ដុះត្រង់ទីនោះក៏លូតលាស់ល្អខុសពីគេដែរ ។

វិធីប្រែក្លាយដីឲ្យល្អដោយការប្រើធ្យូងនេះ គឺមិនចាំបាច់ត្រូវកាប់ដើមឈើមកដុតធ្យូងនោះទេ ត្រឹមតែកូនឈើដែលគ្មានប្រយោជន៍នៅក្បែរខាងផ្ទះវាអាចប្រើការបានដូចគ្នាតែប្រការសំខាន់ជាងគេនោះ គឺត្រូវដុតវាក្នុងរណ្តៅ ឬកាយជាចង្អូរវែងៗ តែមិនត្រូវដុតវាឲ្យឆេះមានអណ្តាតភ្លើងធ្លោឡើងនោះទេ គឺដុតវាត្រឹមតែឲ្យវាឆេះហុយៗ កុំឲ្យតែរលត់ទៅបានហើយ នោះទើបវាមានគុណភាពល្អ ។

ធ្យូង + ដី = មិនបាច់ប្រើជី និងជួយបង្កើនគុណភាពដីជាពិសេសចំពោះដីដែលបាត់គុណភាព និងជីជាតិ ។

នៅក្នុងប្រទេសខ្លះអ្នកដាំដំណាំ មិនបានប្រើជីទេគេបែរជាទិញ ធ្បូងយកមកដំឲ្យខ្ទេចរួចដាក់វាពង្រាយត្រង់ទីដែលគេដាំដំណាំ (សូមមើលរូប) ទោះបីជាដាំបន្លែ ឬដំណាំធំៗ ក៏ដោយចុះ ។ នៅអាហ្វ្រិចកសិករភាគច្រើនបានចាប់ផ្តើមយល់ដឹងច្រើនពីគុណភាពរបស់ធ្យូងដោយដឹងថាវាមានប្រយោជន៍យ៉ាងច្រើនចំពោះដំណាំ និងដីដែលគេដាំដំណាំ ៕

ឈប់ប្រើជីងាកមកប្រើធ្យូងជាជំនួសវិញ

Filed under: Business & Investment

LOVE EXPRESSION

WILLIAM — Mon, 26 Dec 2011 05:04:21 +0000

ធ្វើយ៉ាងណាទើបដឹងថាស្ត្រីនោះស្រឡាញ់ចូលចិត្តយើង !

មានបុរសមួយចំនួនបានលង់ស្នេហ៍ជាមួយនារីណាម្នាក់ដែលខ្លួនបានលួចស្រលាញ់ប៉ុន្តែបុរសនោះបែរជាមិនបានដឹងអ្វីទាំងអស់ថា តើនារីនោះស្រឡាញ់ខ្លួនវិញដែរឬយ៉ាងណានោះឡើយ នេះក៏ព្រោះតែបុរសមិនបានដឹងពីសញ្ញាជាតម្រុយមួយចំនួនដែលនារីនោះបានប្រាប់ឲ្យដឹង ។

ជាធម្មតាស្ត្រីមានការអៀនខ្មាស់ច្រើននាងមិនអាចនិយាយចេញនូវពាក្យថា ‘ ស្រឡាញ់ ‘ ប្រាប់ដល់បុរសដែលនាងពេញចិត្តនោះឡើយ ។ ដូច្នេះអ្វីដែលនាងអាចឆ្លើយតបត្រឡប់ទៅបុរសនោះវិញ បើនាងពេញចិត្តដែរនោះ គឺបានត្រឹមតែជាកាយវិការ ជាសញ្ញាត្រឡប់មកវិញប៉ុណ្ណោះ តែបើបុរសនោះឯងល្ងង់មិនចេះបកស្រាយប្រស្នានៃកាយវិការរបស់នាងទេនោះ គឺច្បាស់ជាត្រូវដេកព្រួយដេកគិតតែម្នាក់ឯងជាមិនខានព្រោះគ្មានចម្លើយជាពាក្យសំដីណាមួយចេញពីមាត់នាងសោះ ស្រួលមិនស្រួលឡើងដើមឈើអើតមើលដំបូលផ្ទះនាងផងក៏មិនដឹង !

បុរសៗត្រូវចាំថាមិនមែនស្ត្រីទាំងអស់ដូចគ្នានោះឡើយ ស្ត្រីខ្លះបើស្រឡាញ់ហ៊ានហាប្រាប់ការពិតតែចំណែកស្ត្រីខ្លះទៀតនៅក្នុងមាយាទជាអ្នកអៀនខ្មាស់គោរពទម្លាប់របស់សង្គមពិតជាមិនហ៊ានហាស្តីឲ្យដឹងឡើយ ។

តែមានតម្រុយមួយចំនួនដែលស្ត្រីបានបង្ហាញចេញឲ្យដឹងជាសញ្ញាឲ្យដល់បុរសដែលនាងពេញចិត្ត តែវាក៏អាស្រ័យទៅលើបុរសនោះដែរថា តើចេះបកប្រែសញ្ញានោះដែរឬអត់ ! បើមិនយល់ពីតម្រុយនោះទេច្បាស់ជាត្រូវដេកយំស្រឡាញ់គេតែម្នាក់ឯងមិនខាន…!!!!

ខាងក្រោមនេះជាសញ្ញាខ្លះដែលបង្ហាញថាស្ត្រីនោះចូលចិត្តយើងវិញដែរតែមិនទាន់ប្រាកដថានាងស្រឡាញ់យើងនោះឡើយ កុំទាន់អាលអរអី ! ចាំទាល់តែតម្រុយនោះកើនច្រើនឡើងសិន សឹមសន្និដ្ឋានថាយ៉ាងណាៗ…….។

១. បើស្ត្រីនោះចូលចិត្តចំណាយពេលជាមួយយើង និងចូលចិត្តនិយាយជាមួយយើង !

* បើនាងចូលចិត្តយើង នាងនឹងមិនព្រមឲ្យបាត់បង់ឱកាសបាននៅក្បែរ ឬបានជជែកជាមួយយើងនោះឡើយ ។ នាងនឹងព្យាយាមរកឱកាសឲ្យបានជួបជាមួយយើងបាននិយាយលេងជាមួយនាង និងចំណាយពេលជាមួយយើងទោះបីជានាងមានការលំបាកមកជួបយើងយ៉ាងណាក៏ដោយក៏នាងព្យាយាមឲ្យខានតែបានដែរ ។ នៅរាល់ពេលដែលយើងនិយាយទៅកាន់នាង នាងតែងផ្ទៀងត្រចៀកស្តាប់ជានិច្ច ទាំងចូលចិត្តឲ្យយើងនិយាយឲ្យនាងស្តាប់ និងសួរតបស្តីពីរូបយើងព្រោះនាងចង់ដឹងច្រើនពីខ្លួនយើងនេះស្តែងឲ្យឃើញថានាងចាប់អារម្មណ៍ចំពោះយើងហើយ ។ បើនាងសួរយើងកាន់តែច្រើននោះមានន័យថានាងពេញចិត្តយើង ចង់ដឹងឲ្យបានច្រើនពីយើងនេះគឺជាសញ្ញាមួយល្អ អាចនិយាយបានថាគឺជាការចាប់ផ្តើមមួយពីខាងនាង ។ បើសិនជានៅក្នុងការសន្ទនានោះនាងតែងតែញញឹម និងលួចសម្លឹងមករកយើងផងនោះ, នោះវាលែងមានអ្វីជាសង្ស័យឡើយថានាងពិតជាចូលចិត្តយើងក្នុងករណី ខ្លះនាងថែមទាំងនៅប្រកៀកជាមួយយើង និងមានកែវភ្នែកមួយចម្លែកជាងធម្មតា ។

ប៉ុន្តែបើសិនជានាងងាកចុះឡើងពេលយើងនិយាយទៅរកនាងព្រមទាំងរកឱកាសគេចចេញពីយើងនោះ ស្តែងឲ្យឃើញថានាងមិនពេញចិត្តយើងទេ ជាពិសេសពេលយើងនិយាយទៅរកនាង, នាងបែរជាសម្តែងអាការៈមិនចាប់អារម្មណ៍ចំពោះអ្វីដែលយើងនិយាយទេនោះ វាក៏ជាសញ្ញាមួយបង្ហាញថានាងមិនចូលចិត្តយើងដែរ អាចថានាងចង់បានអ្នកផ្សេងនិយាយរកនាង ឬអាចថានាងបែរជាងាកទៅនិយាយជាមួយអ្នកផ្សេងវិញ នោះក៏ជាសញ្ញាថានាងមិនពេញចិត្តយើងដូចគ្នា ដូច្នេះសូមបុរសៗទាំងឡាយចាំទុកជាតម្រាផងបើគិតថាដូច្នេះដែរ…… ។

២. បើសិនជានាងផ្តល់វិធីសម្រាប់ឲ្យយើងទាក់ទងនាង !!

* បើនាងពិតជាចូលចិត្ត ឬពេញចិត្តចំពោះយើងនាងនឹងផ្តល់វិធីសម្រាប់ឲ្យយើងទាក់ទងនាងជាមិនខានឡើយ ដោយរាប់ទាំងការបង្ហាញផ្លូវទៅផ្ទះនាង ឲ្យលេខទូរស័ព្ទ ឲ្យអ៊ីម៉ែល ឲ្យឈ្មោះ Chat មកយើង ឬនាំយើងឲ្យស្គាល់ផ្ទះរបស់នាង ។

អ្វីដែលប្រាកដជាងគេនោះគឺនាងឲ្យយើងជួយជូននាងទៅផ្ទះនោះគឺជាលេសមួយដែលនាងចង់បង្ហាញថាផ្ទះនាងនៅឯណាក្រែងលោយើងមានបំណងចង់មករកនាង ជួនកាលនាងថែមទាំងណែនាំយើងឲ្យក្រុមគ្រួសារនាងបានស្គាល់ព្រមទាំងនាំយើងចូលក្នុងផ្ទះរបស់នាងផងក៏មាន ។

នេះគឺជាឱកាសមួយដ៏កម្រណាស់ បើសិនជាដូចការរៀបរាប់ខាងលើនោះមែន សូមរកឱកាសណាត់ជួបនាងចុះ នាងពិតជាព្រមតាមមិនខាន តែបើនាងប្រកែកសូមកុំបង្ខំ សូមទុកឱកាសឲ្យនាងផង អាចថាពេលណាមួយនាងយល់ព្រមក៏ថាបាន តែមិនត្រូវសុំនាងដោយត្រង់នៅចំពោះមុខឡើយ គួរប្រើទូរស័ព្ទ ឬ Chat ឬអ៊ីម៉ែលធ្វើជាមេអណ្តើកវិញ ព្រោះការសុំណាត់ចេញក្រៅទល់មុខផ្ទាល់តែម្តងនាងអាចមិនហ៊ានឆ្លើយ ថាព្រមទេ ព្រោះនាងខ្មាស់ ហេតុនេះយើងជាបុរសគួរចេះជ្រើសរើសរកពេលវេលាណាមួយសមគួរ ឬយ៉ាងហោចណាស់បានស្គាល់គ្នាបានយូរបន្តិចសិនដែរ មិនគួរបង្ខំនៅគ្រាដំបូងៗនោះឡើយ ព្រោះអាចថានាងត្រូវការពេលខ្លះ ដើម្បីឲ្យស្គាល់ចិត្តយើងសិនដែរ ។ រឿងមួយទៀតដែលបុរសត្រូវដឹងដែរនោះ គឺទោះបីមានសញ្ញាថានាងចូលចិត្តយើងក៏ដោយចុះ តែបើពេលយើង Call នាង នាងចាប់ផ្តើមនិយាយមករកយើងភ្លាមនោះមានន័យថាវាជាការពិតហើយ ដែលនាងចូលចិត្តយើងអាចនិយាយថានាងពិតជាស្រឡាញ់យើងដែរ ក៏ថាបាន តែបើសិនជាយើង Call ទៅហើយនាងបែរជារកលេសថានាងរវល់ ឬមិនអាចនិយាយបានទេនោះ ឬក៏ Hang up ទៅវិញ សូមកុំព្យាយាមអី នាងគ្រាន់់តែចូលចិត្តយើងតែមិនស្រឡាញ់យើងទេ ដកចិត្តទៅវិញទៅកុំត្រដរធ្វើអ្វីទៀតនាំខាតពេលទេ !

បើទោះបីជារវល់យ៉ាងណាក៏ដោយ ឬនៅចំពោះមុខឪពុកម្តាយបងប្អូនមិត្តភក្តិតែនាងនៅតែរកឱកាសឲ្យបាននិយាយជាមួយយើងនោះ នេះអាចនិយាយបានថាវាជាសំណាងហើយ ព្រោះនាងពិតជាស្រឡាញ់យើងយ៉ាងច្បាស់ណាស់ ព្រោះនាងហ៊ានពុះជ្រែកឧបសគ្គឲ្យតែបានជួបនិយាយជាមួយយើង ។ យូរកាលណានាងចំណាយពេលជាមួយយើងគឺច្រើនប៉ុណ្ណោះដែរ ដែលនាងចូលចិត្តយើងជួនកាលនាងហ៊ានទាំងប្រាប់យើងថា នាងបានយល់សប្តិឃើញយើងទោះបីជាអ្វីដែលនាងនិយាយមកនោះជាការពិតក្តី កុហកក្តី តែសឲ្យឃើញថានាងចាប់អារម្មណ៍ចំពោះយើងខ្លាំងណាស់ ។

៣. នាងតែងណែនាំឲ្យមិត្តភក្តិ ឬក្រុមគ្រួសារនាងបានស្គាល់ :

* បើនាងពេញចិត្តយើងនាងនឹងណែនាំឲ្យមិត្តភក្តិ ឬក្រុមគ្រួសារនាងបានស្គាល់យើង ព្រមទាំងមិនខ្លាចដើរជាមួយយើងចូលក្នុងចំំណោមអ្នកដែលស្គាល់នាងឡើយ ជួនកាលនាងអាចសំដែងចេញឲ្យឃើញថានាងចូលចិត្តយើងទាំងកណ្តាលចំណោមក៏មានដែរ។

៤. នាងចូលចិត្តប៉ះពាល់យើងញឹកញាប់

* បើសិនជានាងប៉ះពាល់យើងញឹកញាប់ ក្នុងពេលដែលនាងជជែកជាមួយយើងទោះបីអង្គុយឈរ ឬដើរក្តី វាជាសញ្ញាថានាងពេញចិត្តយើងណាស់ ឬមានជួនកាលយើងប៉ះត្រឡប់ទៅនាងវិញទោះដោយអចេតនាក្តី ចេតនាក្តី នាងពេញចិត្តឲ្យប៉ះដោយមិនងាកចេញ នេះក៏ជាតម្រុយមួយប ញ្ជាក់ថានាងព្រមក្នុងចិត្តរួចហើយឲ្យយើងប៉ះនាង ។ ទោះបីជាពេលនិយាយគ្នានាងមិនបានប៉ះយើងក្តី តែមិនមានន័យថានាងមិនពេញចិត្តយើងនោះឡើយ នេះអាចថាមកពីនាងនៅមិនទាន់ទុកចិត្ត ឬខ្លាចយើងនៅឡើយក៏មាន ។ បើភ្នែករបស់នាងដៀងសម្លឹងមករកយើងគ្រប់ពេល ឬលួចសម្លឹងមករកយើងក្នុងក្រសែភ្នែកមួយបែបមាយានោះក៏ជាសញ្ញាថានាងចូលចិត្តយើងដែរ តែមិនមែនមានចិត្តស្រឡាញ់យើងផងក៏ថាបាន តែពិតជានាងចូលចិត្តយើង ។

៥. នាងធ្វើត្រាប់តាមយើង

* បើយើងសង្កេតឃើញថានាងចូលចិត្តត្រាប់តាមយើងនោះក៏ជាសញ្ញាមួយថានាងចូលចិត្តយើងដែរ តែវាមិនមានន័យជ្រៅពេកនោះទេ ជួនកាលការដែលនាងធ្វើត្រាប់តាមនោះគ្រាន់តែជាការកំប្លែងលេងក៏មានដែរ ឬអាចថានាងចង់ឲ្យបរិយាកាសនោះប្រកបដោយភាពសប្បាយរីករាយក៏ថាបាន ។ មានកាយវិការមួយចំនួនដែលនាងអាចស្តែងចេញឲ្យឃើញដូចជាអង្គុយជិតយើង ឲ្យអ្វីមួយមកយើងក្នុងកាយវិការមួយទន់ភ្លន់ប្លែកពីធម្មតា ទាំងនេះជាសញ្ញាមួយប្រាប់ថានាងចូលចិត្តយើងហើយ ។

៦. នាងប្រច័ណ្ឌបើមាននារីណាផ្សេងនៅក្បែរយើង

* បើយើង និងនាងជាមិត្តនិងគ្នា ហើយមានអ្នកណាមួយផ្សេងទៀត (ជានារី) មកនិយាយរកយើង ឬយើងនិយាយតបជាមួយនារីផ្សេង នាងបែរជាសម្តែងអាការៈមិនពេញចិត្ត ឬមួម៉ៅ នោះបានន័យថានាងច្រណែន, នាងប្រច័ណ្ឌ នាងមិនសប្បាយចិត្ត ព្រោះមិនចង់ឲ្យយើងទាក់ទងជាមួយនារីផ្សេងក្រៅពីនាង នេះគឺជាតម្រុយនៃការស្រឡាញ់យ៉ាងច្បាស់ វាអាចទៅលើសពីការចូលចិត្តរួចទៅហើយ ទោះបីនាងមិនបានបង្ហាញឲ្យដឹងក៏ដោយចុះក៏ថាពិតណាស់ថានាងស្រឡាញ់យើងហើយ ។

៧. បើនាងសើចពេលយើងនិយាយកំប្លែងលេង

* បើនាងចូលចិត្តយើងនាងអាចសើច សូម្បីរឿងមិនត្រូវសើចក៏ដោយចុះ ទោះបីអ្វីដែលយើងនិយាយនោះមិនគួរឲ្យស្តាប់ ក៏នាងចូលចិត្តដែរនោះ ។ តែបើនាងសើចទាំងបង្ខំ ឬសើចក្នុងន័យពេបជ្រាយ ក្នុងន័យសើចបែបក្លែងក្លាយ ឬគ្រាន់តែជាការគួរសម ហើយងាកមុខចេញ នោះមានន័យថានាងមិនចូលចិត្តយើងទេ បិទមាត់ឈប់និយាយទៅ ។

៨. នាងអាចបង្ហាញភាពស្និទ្ធស្នាលក្នុងចំណោមគេឯង

* បើនាងសម្តែងឲ្យឃើញពីការចាប់អារម្មណ៍របស់នាងចំពោះយើង នាងអាចបង្ហាញកាយវិការមួយអាចឲ្យអ្នកនៅជុំវិញយល់បានថានាងពេញចិត្តយើងជាងអ្នកដទៃ ឬជួនកាលនាងធ្វើឲ្យគេឯងដឹងថា យើងនេះមានទំនាក់ទំនងមួយយ៉ាងពិសេស ជាមួយនាងត្រង់នេះវាគឺជាកាយវិការមួយយ៉ាងប្រាកដថានាងចង់ឲ្យគេគ្រប់គ្នាដឹងថា យើងគឺជារបស់់នាង….. ។ តែសូមប្រយ័ត្នផងកុំញ៉េះញ៉ោះជាមួយនារីណាផ្សេង ទោះបីនៅចំពោះមុខនាងក្តី នៅឆ្ងាយពីភ្នែកនាងក្តី ព្រោះនាងអាចលួចសួរអ្នកផ្សេងពីយើងកាលបើមានអ្នកណាមួយនិយាយមិនល្អប្រាប់នាងនោះវាអាចក្លាយទៅជាថ្នូរប្រច័ណ្ឌមួយមិនខាន ។

៩. យើងអាចជួបប្រទះមុខជាមួយនាងញឹកញាប់

* បើសិនជានាងចូលចិត្តយើង នាងអាចរកឱកាសឲ្យបានជួបមុខជាមួយយើងដោយប្រការណាមួយ ទោះជាមិនមានអ្វីជាសំខាន់ក៏ដោយក៏នាងព្យាយាមឲ្យខានតែបាន ដើម្បីបានជួបយើងដែរ ជួនកាលនាងអាចលួចសួរឲ្យដឹងពីដំណើររបស់យើងទីដែលយើងទៅ ឬយើងនៅកន្លែងណាច្រើនជាងគេ ជួនកាលទៅគ្មានរឿងអីសោះ ប៉ុន្តែនាងព្យាយាមរកឱកាសមកនិយាយជាមួយយើងក៏សឹងមាន ។

១០. នាងរៀបចំខ្លួនប្លែកខុសពីធម្មតាពេលមកជួបយើង

* ក្នុងកាលៈទេសៈមួយ ឬដោយមិនកំណត់ នាងអាចរៀបចំទាំងកាយវិការ ឬមុខមាត់សក់សម្លៀកបំពាក់ ក្លិន, ចរិតខុសពីសភាពធម្មតារបស់នាង ដូចជាសក់នាងសិតស្អាតបាត មានលាបក្រេមមាត់ សម្លៀកបំពាក់ខុសប្លែកពីប្រក្រតី នោះអាចបង្ហាញឲ្យឃើញថានាងព្យាយាមឲ្យមានការចាប់អារម្មណ៍ពីយើងហើយ នេះក៏ជាសញ្ញាមួយយ៉ាងច្បាស់ដែរថា យើងកំពុងស្ថិតនៅក្នុងផ្ទាំងស៊ីបរបស់នាង ។

១១. ស្ត្រីខ្លះលេងល្បែងតាមចង់ជាមួយយើង

* មាននារីខ្លះបានដឹងខ្លួនថា យើងស្រឡាញ់នាង ដូច្នេះនាងក៏ធ្វើជារឹងរូសព្រងើយកន្តើយ តែបានឲ្យតម្រុយតិចតួចមកយើងវិញ ធ្វើឲ្យយើងឆ្ងល់ នេះក៏ជាវិធីមួយចំនួនដែលនារីខ្លះបានធ្វើ ដើម្បីពង្វក់ចិត្តយើង ឲ្យតាមស្រឡាញ់នាងខ្លាំងឡើងៗ ល្បែងបែបការដែលនារីខ្លះធ្វើដូច្នេះ អាចថានាងមានហេតុផលរបស់នាង
(ដោយកញ្ញា សូឡានី )
ទីមួយ : អាចថានាងចង់ដឹងពីទំហំស្រឡាញ់របស់យើងចំពោះនាង

ទីពីរ : អាចថានាងចង់ដឹងថា តើការស្រឡាញ់របស់យើងចំពោះនាងមានការតស៊ូដែរឬទេ? តើយើងព្យាយាមតាមស្រឡាញ់នាង ដល់កម្រិតណាទៅ បើសិនជាបុរសណាមួយដែលស្រឡាញ់នាងហើយខ្វះការព្យាយាមនិងភាពអំណត់, បុរសនោះអាចមិនមែន ជាមនុស្សដែលនាងប្រាថ្នាចង់បានឡើយ តែបុរសដែលតាមនិងស៊ូទ្រាំជាមួយភាពសោះអង្គើយរបស់នាងជាមួយតម្រុយតិចតួចនោះ ទើបបានជាបុរសដែលនាងចង់បាន ព្រោះបុរសនោះ អាចស្រឡាញ់នាងមែនទើបព្យាយាមខាំ្លងបែបនេះ ត្រង់នេះវាគឺជាចំណុចមួយ ដែលបុរសខ្លះត្រូវដឹង ។ ក្នុងពេលតែមួយជួនកាលមានបុរសផ្សេងទៀត(ឬច្រើនទៀត) តាមចែចង់នាងដែរ ដូច្នេះនាងអាចមាន ជម្រើសច្រើន ដើម្បីជ្រើសយកមួយណាដែលនាងយល់ថា អាចឲ្យនាងទទួលយកបាន ជួនកាលទៀតនាងទាក់ទងយើងផង និងទាក់ទងអ្នកផ្សេងផងក្នុងពេលតែមួយ ហើយទំនាក់ទំនងនោះគឺក្នុងក្ដីស្រឡាញ់ដូចគ្នា តែមិនមែនមានន័យថានាងមានចិត្តសាវ៉ា មានចិត្ដរាយមាយនោះទេ ផ្ទុយទៅវិញនោះគឺជាសិទ្ធិរបស់នាងក្នុងការជ្រើសរើសយកអ្នកណាមួយ ក្នុងចំណោមអ្នកទាំងអស់ដែលបានសុំស្រឡាញ់នាង ។ ល្បែងបែបនេះគឺតែងមានអ្នកចាញ់ច្រើននិងមានអ្នកឈ្នះតែម្នាក់ប៉ុណ្ណោះគឺនាងខ្លួនឯង ព្រោះនាងអាចរើសបានអ្នកណាម្នាក់ដែលនាងស្រឡាញ់ពិត ដូច្នេះបុរសដែលនាងទទួលយកគឺគ្រាន់តែជាផលនៃការសម្រេចចិត្តរបស់នាងតែប៉ុណ្ណោះ ដូច្នេះបើសិនជាយើងមិនត្រូវបាននាង សម្រេចចិត្តជ្រើសយកទេសូមកុំតូចចិត្ត នេះគឺមកពីយើងមានអ្វីៗមិនគ្រប់គ្រាន់តាមការចង់បានរបស់នាង។

១២. នាងមានអារម្មណ៍ថាមានសេចក្ដីសុខពេលនៅក្បែរយើង

* ទោះបីក្នុងកាលៈទេសៈណាក៏ដោយ បើយើងសង្កេតឃើញថានាងមានអារម្មណ៍ល្អជាមួយយើងនោះបានសេចក្ដីថា នាង ចង់ប្រាប់យើងថានាងពោរពេញទៅដោយសេចក្ដីសុខគ្រប់ពេលដែលនាងនៅជាមួយយើង នេះក៏ជាកាយវិការមួយប្រាប់ថានាងចាប់អារម្មណ៍ចំពោះយើងដែរ ប៉ុន្ដែបើយើងសង្កេតឃើញថានាងតែងតែរកវិធីគេចចេញពីយើង ឬមានអារម្មណ៍តោះតើយពេលជួបជាមួយយើងនោះមានន័យថា នាងគ្មានអារម្មណ៍ចំពោះវត្តមានរបស់យើងទេ ។ នារីភាគច្រើនមានអារម្មណ៏ថាបុរសណាមួយដែលនាងពេញចិត្ត អាចនិយាយផ្ដោះផ្ដងជាមួយនាងបាននូវគ្រប់ហេតុផលជាមួយពាក្យសំដីមួយជាក់លាក់ច្បាស់ៗប្រកបដោយការយល់ដឹង ខ្ពស់ នោះនាងអាចគិតថាបុរសនោះមិនមែនជាមនុស្សដែលចូលចិត្តនិយាយសំដីមិនបានការនោះឡើយ ហើយជាពិន្ទុមួយខ្ពស់ សម្រាប់ឲ្យនាងធ្វើការវិនិច្ឆ័យ និងឈានទៅដល់ការសម្រេចចិត្តថា តើយើងជាមនុស្សប្រភេទណា គួរឲ្យនាងស្រឡាញ់ដែរឬទេ ឬក៏រាប់អានត្រឹមជាមិត្ត ។ ដូច្នេះបុរសៗគួរគិតឲ្យបានមួយរយដងសិន មុនហាស្ដីទៅនារីដែលខ្លួនស្រឡាញ់ ព្រោះមួយម៉ាត់ៗដែលយើង និយាយចេញ គឺសឹងជាពិន្ទុរបស់យើងទាំងអស់ និងសូមកុំគិតថានារីជាភេទទន់ខ្សោយតែងគ្មានបញ្ញាឲ្យសោះ នាងអាចឆ្លាតជាងយើងផងក៏មាន ។

១៣. នាងចងចាំថ្ងៃពិសេសរបស់យើង

* នារីខ្លះគាត់ព្យាយាមចាំឲ្យបានពីថ្ងៃខែកំណើតរបស់យើងឬថ្ងៃអ្វីមួយដែលនាងគិតថាវាជាថ្ងៃពិសេសសម្រាប់នាង ដូច ជាថ្ងៃដែលនាងបានជួបនិយាយជាមួយយើង ថ្ងៃដែលនាងបានស្គាល់យើង បើសិនជានាងរំលឹកឬសួរនាំរកថ្ងៃទាំងនោះ នោះបានសេចក្ដីថា នាងពេញចិត្តយើងទាំងស្រុងហើយ ព្រោះវាជាអ្វីដែលនាងចងចាំនិងចង់ឲ្យយើងចងចាំដែរ តែបើសិនជានាងភ្លាត់សួរយើង ថាតើ ចាំ ថ្ងៃនេះ ថ្ងៃនោះដែរឬទេ? តែយើងបែរជាមិនចាំវិញនោះនាងអាចយល់បានថាយើងចាប់អារម្មណ៍ចំពោះនាងតែខាងក្រៅទេ មិនបានយកចិត្តទុកដាក់បំផុតនោះឡើយ ពិន្ទុរបស់យើងក៏ថយបន្តិចដែរ ។

១៤. នាងនិយាយពីអនាគតខាងមុខជាមួយយើង

* នារីដែលបាននិយាយថានៅពេលខាងមុខនាងប្រាថ្នាចង់បានយ៉ាងនេះយ៉ាងនោះចង់បានបុរសម្នាក់ដែលអាចធ្វើបែបនេះ បែបនោះ នោះវាមានន័យគ្រប់គ្រាន់ថានាងចង់ស្ដែងចេញពីដួងចិត្តនាងឲ្យបុរសនោះបានដឹងនិងចង់បានការឆ្លើយតបមួយរបស់យើង ត្រឡប់មកវិញ បើនាងគ្មានការចាប់អារម្មណ៍ចំពោះយើងទេ នាងនឹងមិននិយាយចេញពីបំណងអនាគតរបស់នាងឲ្យយើងដឹងឡើយ យើងអាចកាត់យល់បានថា នាងពេញចិត្តយើងហើយទើបនាងនិយាយពាក្យនេះចេញមក ម្យ៉ាងវិញទៀតនោះនាងចង់ដឹងថា តើយើងមានបំណងយ៉ាងណាដែរ បើសិនជានាងនិយាយដូច្នោះ ។

១៥. នាងរកឱកាសបានជួយយើង

* ស្ដ្រីដែលបង្ហាញឲ្យឃើញពីបំណងរបស់នាងចំពោះយើង គឺមិនមែនតាមរយៈពាក្យសំដីទាំងស្រុងនោះឡើយជួនកាល ត្រឹមតែតាមរយៈកាយវិការរបស់នាង គឺល្មមអាចឲ្យយើងយល់បានថានាងពេញចិត្តយើងដែរ :

* នាងព្យាយាមជួយដល់កិច្ចការដែលយើងមាន

* នាងជួយជាយោបល់ចំពោះបញ្ហាដែលយើងជួបប្រទះ

* នាងសំដែងឲ្យឃើញពីចិត្តឈឺឆ្អាលចំពោះយើង

* ប្រាប់អ្នកផ្សេងថានាងចង់ជួយយើង

* រកឱកាសឲ្យបានមកនិយាយប្រឹក្សាជាមួយយើងពីបញ្ហានានា

* នាងឲ្យយោបល់យើងច្រើន ព្រោះតែនាងស្រឡាញ់យើង ….៕

Filed under: Business & Investment

VATTANAC BANK

WILLIAM — Mon, 22 Aug 2011 05:14:41 +0000

Filed under: Business & Investment